പണ്ട് അറബികഥകളില്‍ വായിച്ചറിഞ്ഞ ദൂരെ കടലിനക്കരെയുള്ള സുല്‍ത്താന്‍റെ കൊട്ടാരം... പൊന്നു വിളയുന്ന നാട്... സ്വപ്നങ്ങളുടെ പറുദ്ദീസ... അത്തര്‍ മണക്കുന്ന "ഗള്‍ഫ്‌"... കുട്ടിക്കാലത്ത് ഒരുപാട് കൊതിച്ചിട്ടുണ്ട് കഥകളിലൂടെ മനസ്സില്‍ രൂപംകൊണ്ട സുല്‍ത്താന്‍റെ ആ നാടുകാണാന്‍, വിമാനത്തില്‍ കയറണം... ഗള്‍ഫില്‍ പോണം... ഒത്തിരി കാശുണ്ടാക്കണം... എന്നിട്ട് കിട്ടാവുന്നത്രയും ചോക്കലേറ്റ്സും, ഐസ്ക്രീമും വാങ്ങണം... അതായിരുന്നു അന്നത്തെ എന്‍റെ ഏറ്റവും വലിയ ആഗ്രഹം...
എന്നാല്‍ മുതിര്‍ന്നപ്പോ ഗള്‍ഫ്‌ എന്ന ഒരു ഡ്രീം എന്നില്‍ ഇല്ലായിരുന്നു... പക്ഷെ ജീവിത സാഹചര്യങ്ങള്‍ എന്നില്‍ ഉണര്‍ത്തിയ വാശികളും, വെല്ലുവിളിച്ചവര്‍ക്ക് മുമ്പില്‍ ജയിച്ചു നില്‍ക്കാനുള്ള ആവേശവും, പലതും നേടിയെടുക്കാനും, സ്വന്തമാക്കാനും എന്നെ പ്രേരിപ്പിക്കുകയായിരുന്നു... അതുവരെയുള്ള എന്‍റെ കൊച്ചു സ്വപ്നങ്ങള്‍ എന്നില്‍നിന്നും വഴിമാറിയ നിമിഷങ്ങളായിരുന്നു അത്... പകരം വന്ന സ്വപ്നങ്ങള്‍ എന്നെ വീണ്ടും ഗള്‍ഫ്‌ സ്വപ്നം കാണാന്‍ നിര്‍ബന്ധിച്ചു കാരണം എന്നെ സംബന്ധിച്ചിടത്തോളം അവക്ക് വളരെ വിലയായിരുന്നു... അതുകൊണ്ടുതന്നെ ഈ നാട് എന്നെ മാടിവിളിച്ചപ്പോള്‍ ഞാന്‍ മറ്റൊന്നും ചിന്തിച്ചില്ല... അങ്ങനെ അന്ന് ഞാനും ഒരു പ്രവാസിയായി...
വീടും വീട്ടുകാരും അങ്ങനെ പ്രിയപ്പെട്ടവരാരും അരിക്കിലല്ലാത്ത ജീവിതമാണ്... എന്നാലും ആരോടോക്കെയുള്ള ഒരു വാശി എന്നെ ഇവിടെ ജീവിക്കാന്‍ പ്രേരിപ്പിക്കുന്നു.
